ILOILO – Temporaryo nga gin-ban ang tanan nga probinsay sang Luzon gikan sa pagpasulod sang swine ukon buhi nga baboy kag nakaproseso nga mga produkto sini sa bilog nga probinsya sang Iloilo.
Ini ang kabahin sa pag-amyendar nga ginhimo ni Iloilo Governor Arthur Defensor Jr. sa Executive Order 159 kasunod sang nagalapta na nga kaso sang African Swine Fever sa nagkalain-lain nga probinsya sa Luzon.
Sa interview sang Bombo Radyo kay Defensor, iya ginpahayag nga “dapat dugangan ang kudal” sang probinsya agud masigurado ang proteksyon, ilabi na bangud may mga kaso na sang swine fever sa Pangasinan, Cavite, Nueva Ecija, kag Quezon.
Nahibaluan nga probinsya lang sang Rizal kag Bulacan ang indi pwede makapasulod sang ila swine products sa Iloilo sang una nga pag-isyu sang Executive Order 159.
Epektibo suno kay Defensor ang implementasyon sang amo nga order, lakip na ang quarantine measures nga ginapangunahan sang Bureau of Animal Industry.
Dugang ni Defensor, mabaskog man ang suporta sang Philippine National Police paagi sa ila mga checkpoints.
Iya ginpahayag nga padayon pa ang pag-obserba sa “trending” sang kaso sang African Swine Fever sa bilog nga Luzon, apisar nagikan sa Cebu, Cagayan de Oro, kag Negros Occidental ang kalabanan sang suplay sang produkto sang baboy nga nagaabot sa probinsya sang Iloilo.
