ILOILO – Indi mahapos ang mangin isa ka anak sang Overseas Filipino Worker.
Sa Good Morning Philippines program, ginpahayag ni Kevin Escopel, 21, sang Brgy. Cagamutan Sur, Leganes, Iloilo, nga mabudlay para sa isa ka anak ang mapahilayo sa ginikanan apang mas mabudlay para sa ginikanan ang mapahilayo sa anak.
Suno kay Escopel, nagdaku siya kaupod ang iya magulang nga malaka lang nagapauli ang ila amay nga nagatrabaho sadto bilang isa ka seaman.
Ginpahayag ni Escopel nga bangud sa Long Distance Relationship, indi man malikawan nga may yara sang problema sa tunga sang iya ginikanan.
Bilang estudyante naman, ginpahayag sang natungdan nga indi niya malikawan kun kaisa nga magkasubo bangud nga sa tion sang school recognition, ang iya iloy lamang ang nagatambong.
Ang kabudlay nga naagyan ang ang ginhimu ni Escopel nga inspirasyon sa pagtuon tubtub nga nakatapos sila nga mag-utod sa pagtuon.
Naka-angkon sang brain tumor ang iya amay rason nga nag-untat ini sa pagtrabaho sa barko kag nagtrabaho bilang manunudlo rason nga nagabulig man sila nga mag-utod kaupod ang ila iloy sa pagpangita sang palangabuhi-an.
Sa pihak sini, ginpahayag sang natungdan nga dapat palanggaon kag hangpon ang ginikanan ilabi na ang mga nagatrabaho sa malayo nga lugar.
