ILOILO – Ginpamatud-an sang 20 anyos cancer survivor nga wala sang imposible kun nagatinguha kag nagasalig sa Ginuo.
Sa Good Morning Philippines program, ginpahayag ni Princess Sarah Espinosa sang Banate, Iloilo, ang iya gin-agyan agud nga malampuwasan ang balati-an nga ovarian cancer.
Suno kay Espinosa, 16 anyos siya sang natukiban nga may yara sang tumor sa iya ovary matapos ang pag-angkon sang Urinary Tract Infection tuga sang unhealthy lifetyle.
Ginpahayag ni Espinosa nga sulundon sa lahi sang iya amay ang pag-angkon sang balati-an nga cancer apang wala gid siya naghuna-huna nga isa man siya sa madapu-an sang nasambit nga balati-an.
Wala nangin mahapos para sa first year Psychology student ang chemotheraphy journey matapos ang ginpatigayon nga surgery kag nangin daku nga pagpanghangkat para sa iya kag sa bug-os nga pamilya kun paano malampuwasan ang nasambit nga balati-an.
Samtang nagapaayo, wala siya nadulaan sang paglaum sa bulig man sang pagpalangga sang iya pamilya kag pagpangamuyo.
Sa pihak sang gin-agyan nga pagpanghangkat, ginpahayag sang natungdan nga indi solusyon ang pag-utas sang kabuhi agud nga palagyuhan ang problema bangud nga pagbuot sang Ginuo ang tanan.
