ILOILO- Padayon pa ang imbestigasyon sang Philippine Army sa natabo nga encounter sa tunga sang Revolutionary Proletarian Army- Alex Bongcayao Brigade kag New People’s Army sa Sitio Cunla,Brgy. Cunsad, Alimodian, Iloilo.
Sa interview sang Bombo Radyo kay Capt Cenon Pancito III,public affairs chief sang 3rd Infantry Division sang Philippine Army, iya ginpahayag nga gina verify pa sa gihapon kun bala ang gin ugatan sang encounter, personal nga hilugut-anon ukon bangud nga ang Revolutionary Proletarian Army- Alex Bongcayao Brigade ang isa na ka makabig nga auxiliary sang Philippine Army.
Nahibaluan nga ang Revolutionary Proletarian Army- Alex Bongcayao Brigade ang mga anay rebelde apang nagbalik sa gobyerno sa diin ang iban sa ila ang ginpaidalom sa training, ginhatagan sang armas nga gin- isyu sang gobyerno, kag may mga benepisyo pa nga ginabaton.
Suno kay Pancito, posible nga isa man sa nangin ugat sang encounter ang natabo nga shooting incident sang nagligad nga Enero 12, sa diin gintiro sang mga katapo sang New People’s Army si Ramie Cataluna nga ginapahayag miembro sang Revolutionary Proletarian Army- Alex Bongcayao Brigade sa banwa sang San Joaquin.
Dugang pa ni Pancito nga bangud sini mas pabaskugon pagid sang Philippine Army ang ila nga pagbulig sa mga Revolutionary Proletarian Army- Alex Bongcayao Brigade nga may yara sang detachment sa area.
May yara naman sang malapit nga detachment ang Philippine Army sa lugar.
