ILOILO CITY- Gintipon sang Task Force on Moral Values Formation ang mga Guest Relations Officer nga nagaliho-liho sa dalan sa kada gab-i.
Sa interview sang Bombo Radyo kay Nestor Canong, pinuno sang Task Force on Moral Values Formation, iya ginpahayag nga ginsapol niya ang masobra sa 20 ka mga Guest Relations Officer nga ginakabig na subong nga mga ‘freelance sex workers’ agud istoryahan ang mga plano para sa ila kaayuhan.
Suno kay Canong, ini nga lihok ang kabahin sang pagpanghanda sa pagsaulog sang Dinagyang Festival 2020.
Ginpahayag ni Canong nga sa iya nga pag-istorya sa mga Guest Relations Officer, natukiban nga kalabanan sa ila ang napilitan lang nga magsulod sa nasambit nga trabaho.
Dugang pa sang natungdan, ginpahangop man niya ang mga freelance sex workers nga magparehistro kag magpaidalom sa regular check-up agud makalikaw sa balati-an.
Plano sang natungdan nga ipalab-ot kay Iloilo City Mayor Jerry Treñas ang tuhoy sa problema sang mga sex worker agud nga indi na magbalik sa kasubong nga buluhaton.
