CAMP MONTECLARO, MIAGAO ILOILO- Nagsungka pinaagi sa isa ka negosasyon ang isa sa mga piakamataas nga leader sang New Peoples Army.
Ang surrenderee ang ginkilala nga si alyas Cardo 49 anyos kag tumandok sang Tubungan, Iloilo.
Sa interview sang Bombo Radyo kay Colonel Marion Sison, commander sang 301st Infantry Brigade sang Philippine Army, iya ginpahayag nga si alyas Cardo ang vice commander sang Sibat Platoon, Southern Front Kimiteng Rehiyon Panay sang New Peoples Army nga naga-operate sa area sang Iloilo.
Suno kay Sison, natigayun ang pagsungka ni alyas Cardo pinaagi sa bulig ni Tubungan Mayor Roquito Tacsagon kag sa bulig man ni Senior Fire Officer 3 Russell Gotera sang Bureau of Fire Protection- Guimbal.
Ginpahayag ni Sison nga nagdesisyon si alyas Cardo nga magbalik sa sabak sang gobyerno, bangud sa halos 8 niya ka tuig nga pag-upod sa makawala nga grupo, wala gid natuman ang ginpromisa sa iya.
Napamatud-an sang surrenderee nga indi matuod ang ginapahayag sang mga rebelde nga kun madakpan sang militar, ginasakit kag ginapatay sila.
May yara man sang warrant of arrest si alyas Cardo suno kay Sison bangud sa kaso nga rebellion.
Nahibaluan nga si alyas Cardo ang igapaidalom sa Enhanced Comprehensive Local Integration Program kag pagahatagan sang bulig.
