Natapos na ang 14 ka adlaw nga quarantine sa mga Pilipino nga iga-repatriate halin sa Wuhan, China lakip man ang nagabug-os sang repartriation team.
Suno kay Dr. Neptali Labasan, Medical Officer IV sang Bureau of Quarantine, tuman ang kasadya sang Pilipino bangud makapauli na sila sa ila tagsa ka mga lugar.
Antes pagguwaon, ginahibalo anay ang temperatura sang 49 ka Pilipino agud makasigurado nga wala na sila sang simtomas sang Coronavirus Disease 2019.
Sa isa ka send-off ceremony, ginhatagan sila sang Certificate of Completion sa quarantine period sa diin inpangunahan ni Department of Health Secretary Francisco Duque III ang seremonya.
Mahimo man nga makatawag ang repatriates sa Department of Health sa tion nga may mabatyagan nga sintomas sang COVID-19.
Matapos makahalin ang repatriates, ginpaidalom naman sa disinfection ang New Clark City bilang pagpanghanda sa masunod nga batch sang mga Pilipino nga ipaidalom sa quarantine.
Nahibaluan nga ginkansela na ang pagpauli sang halos 500 ka mga Pilipino nga sakay sang Diamond Princess Cruise ship nga natalana kun tani subong nga adlaw kag nagdesisyon ang Inter-Agency Task Force on Emerging Infectous Diseases nga i-reschedule ang pagpauli sang mga Pilipino sa masunod nga semana.
Suno kay Duque, ginahulat pa nila ang abiso gikan sa Japanese government bangud nagakinahanglan pa nga kompletuhon ang tanan nga quarantine protocols kag testings.
Sa subong, halos tunga pa lang ang nakapaidalom sa nagkalain-lain nga tests agud mapamatud-an nga negatibo sila sa COVID-19.
Nakahanda naman ang nagkalain-lain nga ahensya sang gobyerno sa pagpauli sang mga Pilipino nga nakasakay sa nasambit nga barko.
