Nanindugan ang Malacañang kag Department of Science and Technology nga ginahatagan sang Office of the President sang bastante nga pondo ang Department of Health, Department of Science and Technology kag University of the Philippines Manila National Institute of Health nga pagagamiton para sa produksyon sang Diagnostic Kits sang Coronavirus Disease 2019.
Sa joint statement nga ginpagwa ni Department of Science and Technology Secretary Fortunato De la Peña kag Presidential Spokesperson Salvador Panelo ginpanginwala sang duha ka opisyal nga ginakulang ang pondo para sa pagbakal sang mga testing kits.
Dugang pa sang mga natungdan, may yara na sang nakatalana nga pondo para sa mga test kits apang bukas sila sa gihapon sa mga luyag mag donate.
Nanawagan naman si Panelo kag Dela Peña sa publiko nga likawan ang pagpalapta sang sala nga mga impormasyon sa social media nga nagatuga lang sang panic kag kakugmat.
Nagpasalig ang duha ka opisyal nakahanda ang gobyerno agud masiguro nga hilway ang tanan sa makamamatay nga virus.
