ILOILO – Nangin epektibo ang pagpatuman sang Enhanced Community Quarantine sa Anilao, Iloilo rason nga amat-amat nga nagnubo ang numero sang Persons Under Investigation kag Persons Under Monitoring.
Sa interview sang Bombo Radyo kay Mayor Nathalie Ann Debuque, iya ginpahayag nga sa subong, may yara na lang sang 27 ka Persons Under Monitoring sa diin 85 na ang nakatapos sang 14 ka adlaw nga quarantine samtang apat nalang ang Person Under Investigation.
Suno kay Debuque, ginasigurado nga nagasunod ang tanan ilabi na sa curfew apang gin-ako sang natungdan nga wala pa nakasugod sa pagpanghatag sang ayuda sa mga apektado nga pumuluyo bangud wala pa nila nabaton ang P1 Million halin sa Iloilo Provincial Government.
Ginkumpirma sang alkalde nga may yara sang poultry farm sa Anilao ang COVID-19 patient apang base sa imbestigasyon, madugay na nga wala nakapadulong ang nasambit nga pasyente sa ila nga banwa.
Bangud sini, nadesisyunan nga ipaidalom na lang sa quarantine ang tanan nga mga empleyado sang nasambit nga poultry farm.
