ILOILO CITY – Maayo ang nangin resulta sang programa sang Department of Agriculture nga KADIWA ni ANI at KITA nga nagabulig sa mga mangunguma nga mabaligya ang ila produkto apisar sang Enhanced Community Quarantine.
Sa interview sang Bombo Radyo kay Solmmy Ojario, marketing supervisor sang Hybrid Rice Feeds sang Department of Agriculture 6, iya ginpahayag nga indi lang ang mga mangunguma ang nakabenepisyo sa nasambit nga programa kundi lakip man ang mga pumuluyo nga nagapamalaklon sang mga produkto gikan sa nagkalain-lain nga banwa sa probinsya sang Iloilo.
Suno kay Ojario, may yara na sang delivery truck ang Department of Agriculture agud mas madasig ang pagbyahe sang mga produkto kag hugot man nga ginapatuman ang physical distancing sa mga manugbakal.
Nahibaluan nga kada Martes, yara sa Iloilo Terminal Market kag Arevalo Plaza ang KADIWA ni ANI at Kita; sa Molo Plaza kag Iloilo Terminal Market kun Huwebes; Lapaz kag Mandurriao Plaza kun adlaw sang Sabado humalin 7:00 – 10:00 sa aga.
