ILOILO CITY- Ginpermaham na ni Iloilo Governor Arthur Defensor Jr. ang executive order nga magapalawig sang enhance community quarantine sa probinsya sang Iloilo tubtob sa Abril 30, 2020.
Sa interview sang Bombo Radyo kay Iloilo Governor Arthur Defensor Jr. iya ginpahayag nga sa idalom sang executive order no. 102, palawigun pa ang quarantine sa probinsya bangud man sa pamahog sang coronavirus disease 2019.
Suno kay Defensor, palawigun man ang travel restrictions sa pagwa kag pasulod sa probinsya sang Iloilo.
May gindugang naman siya nga mga pagsulundan sa executive order suno kay Defensor, kaangay nalang sang mandatory testing sa mga persons under monitoring kag persons under investigation sa tagsa nila ka mga kabarangayan.
Pahayag pa niya, ang mga nagapakita sang mga sintomas sang virus ang igamonitor kag pangitaon sang Barangay Health Emergency Response Team agud mapatest kag gilayun nga mapabulong, bangud sa subong may yara na sang mga test kits para sa mga pasyente.
Dugang pa sang gobernador ilakip sa pagtest ang mga medical personnel, iban pa nga mga frontliners, mga may edad, mga nagabusong, mga persona nga may comorbidity, nga kun matapikan sang sakit mabutang sa sersyosa nga kahimtangan ang ila ikaayong lawas.
