ILOILO CITY- Suspendido suno sa Land Transportation Office ang pagpanukot sang penalidad sa mga bayolasyon, renewal sang lisensya, registration kag iban pa nga mga transaksyon tubtob nga makabalik sa normal ang operasyon sang ahensya.
Ini bangud man sa ginapatigayun kag mas ginpalawig sang enhanced community quarantine sa syudad kag probinsya sang Iloilo.
Sa interview sang Bombo Radyo kay Land Transportation Office Regional Director Eric Tabaldo, iya ginpahayag nga indi man magdugang kag wala sang interes ang mga pending nga penalidad.
Suno kay Tabaldo, naintindihan nila ang sitwasyon sa subong kag ini lang ang pamaagi agud makabulig sila sa mga pumuluyo.
Suspendido man suno sa iya ang pagpatuman sang no plate no travel policy .
Pahayag pa niya, kun indi manlang importante ang kadtuan, likawan nalang ang pagwa sa balay agud makalikaw sang virus.
Nagapangabay man ang natungdan nga kuntani, indi man pag-abusan sang mga drivers kag snag mga pumuluyo ang pagsuspinde nila sa penalidad kag iban pa nga serbisyo.
