ILOILO CITY – Apisar ginadumilian ang mga pagtilipon subong nga panahon bangud sang coronavirus outbreak, mahimo gihapon nga selebrahon sang mga tawo ang Biyernes Santo paagi sa pagpamalandong kag pagdangop sa Ginuo.
Sa interview sang Bombo Radyo kay Rev. Fr. Angelo Colada, spokesperson sang Archdiocese of Jaro, iya ginpahayag nga duha ang mahimo mangin salandigan sang mga tawo subong nga adlaw, Abril 10.
“Ang krus amo ang central element sang kabuhi ni Jesus. Kag dapat nga mangin sentro man ini sang aton tagsa-tagsa ka kabuhi… Subong nga panahon, may ara sa aton nga luyag maangkon ang himaya kag ang kasulhayan, apang indi luyag magpas-an sang ila kaugalingon nga krus,” pahayag ni Colada.
Suno kay Colada, bangud sang coronavirus disease 2019 (COVID-19) crisis, indi dapat nga pagpalagyuhan ang pag-antos bangud ‘isa ini ka importante nga elemento sang pagtuo’.
Sa baylo nga palagyuhan suno sa natungdan, dapat nga idangop ini sa Dios.
“May mga tawo ako nga nakita sa gwa sang simbahan, naga-bike, pero nagadulog sila anay kag magpangadi.”
Suno kay Colada, ang ini nga pandemic ang isa ka pahanumdom nga magbalik kag magsalig sa kabubut-on sang Ginuo.
Magluwas diri, dapat man suno sa iya nga dumdumon ang ‘kabalaka kag pagkamainunungon’.
“Ang pagpamalandong sa Krus nagahimo sa aton nga mangin mainunungon kag mabinalak-on sa mga utod naton nga naga-antos tungod sining COVID-19, tungod sining kalalat-an, tungod sining virus.”
Ginpahanumdom man ni Colada nga si Hesukristo ang isa ka ehemplo sang pagkamainunungon antes ini napatay sa Krus.
“Nakita naton kun paano ang Dios nag-unong sa iya katawhan. Wala siya nagsaad nga kuhaon Niya ang aton problema, kundi nag-promisa Siya nga tagaan Niya kita sang dugang nga kusog sa pag-atubang sa mga pagtilaw kag mga problema sa aton kabuhi.”
Subong nga Semana Santa, suno sa natungdan, mahimo nga gamiton ang tion agud magpangamuyo kaupod ang bilog nga pamilya kag ‘i-angot ang sakripisyo ni Hesus sa mga palas-anon.’
