ILOILO CITY– Temporaryo nga indi magbatun sang magapauli nga Overseas Filipino Workers ang syudad sang Iloilo kun indi magsunod sa ginpatuman nga protocol ang Overseas Workers Welfare Administration.
Sa interview sang Bombo Radyo kay Iloilo City Mayor Jerry Treñas, iya ginpahayag nga tubtob indi magsunod ang talatapan sa pagsulundan, indi pagpahanugutan nga makasulod sa syudad sang Iloilo ang mga OFW.
Suno kay Treñas, dapat may yara sang protocol ang OWWA nga antes sila magpadala sang mga OFW sa syudad, may yara na sang rapid test results halin sa Manila.
Kun madamo pa ang mga magaabot nga OFW, indi na ini masarangan pa sang syudad kag nagakadapat nga ang OWWA mismo ang magapangita sang pasilidad nga sarang maka-akomodar sa ila.
