ILOILO CITY – Napirmahan na ni Iloilo City Mayor Jerry Treñas ang duha ka Executive Order may kaangtanan sa amat-amat nga pagdula sang Expanded Enhanced Community Quarantine sa syudad sang Iloilo.
Isa sa mga ginpirmahan sang alkalde amo ang pagtukod sang Adhoc Committee nga amo ang magadihon kag magarekomenda sang pagsulundan sa gradual lifting sang Expanded Enhanced Community Quarantine.
Sa interview sang Bombo Radyo kay Treñas, iya ginpahayag nga pagatun-an sang Adhoc Committee kun paano ang amat-amat nga pagbalik sa normal sang sitwasyon.
Suno kay Treñas, tun-an man sang nasambit nga komitiba kun ano nga mga negosyo ukon establisyemento ang unahon nga buksan.
Magluwas sa mangin rekomendasyon sang Adhoc Committee, ginahulat man sang alkalde ang pinal nga rekomendasyon sang Inter-Agency Task Force may kaangtanan sa pagdula sang Expanded Enhanced Community Quarantine.
Sa tion nga mabalik na sa normal ang sitwasyon, sundon sa gihapon ang physical distancing kag pagsuksok sang facemask sa tion nga magguwa sa balay.
Kadungan sini, ginpirmahan man ni Treñas ang mandatory nga pagdala sang Unified Quarantine Pass sa tion nga maggwa sa balay sa tion sang weekend block off.
Santo sa pahayag ni Mayor Treñas, nabaton na sang Liga ng mga Barangay ang Unified Quarantine Pass kag amat-amat na nga napanghatag.
Ang Unified Quarantine Pass ang mahimo ipakita sa mga otoridad sa tion nga maggwa sa balay sa tion sang weekend sa diin isa lang kada household ang pagahatagan sang nasambit nga pass.
Magapangatubang sang nagakaigo nga silot kag pasakaan sang kaso administratibo ang sin-o man nga madakpan nga wala nagasunod sa pagsulundan.
Hatagan sang tion kag prayoridad ang mga senior citizen nga magapadulong sa mga merkado agud mamalaklon.
