ILOILO CITY- Nagahingyo ang Overseas Filipino Workers nga kun tani amyendaran ang layi nga nagamando nga magbayad sang mandatory 3% nga kontribusyon sa Philippine Health Insurance Corporation.
Suno kay Edwin Pancho Fario Jr. nga nabase sa Nigeria, iya ginpahayag nga kun tani, tun-an sang gobyerno ang pagpatuman sang nasambit nga layi.
Ginpahayag ni Fario, nga mas makapaayo nga ang katunga sang ila kontribusyon ang pagabayaran sang ila employer samtang ang katunga naman ang pagabayaran nila nga mga OFW.
Kun ang employer ang magayabayd sang katunga, indi mangin mabug-at para sa ila ang mandatory 3% nga Philhealth contribution.
Nahangpan man sang natungdan ang luyag matabo sang gobyerno apang indi malikawan nga kun dako ang pondo, madata man ang nagakatabo nga kurapsyon.
Samtang, nagdihon na sang online petition ang Overseas Filipino Workers sa Kuwait may kaangtanan sa isyu sang mandatory 3% contibution sa Philippine Health Insurance Corporation.
Sa interview sang Bombo Radyo kay Oliver Diong, mabug-at para sa ila bahin ang nasambit nga patakaran ilabi na nga may yara sang Coronavirus Disease 2019 (COVID-19) pandemic sa diin halos 30,000 ka mga OFW sa Kuwait ang no work no pay.
Ginpahayag ni Diong nga ang petisyon nga ila gindihon ang ila igapalab-ot kay Presidente Rodrigo Duterte kag mismo sa Philhealth.
Ang kaundan sang petisyon suno kay Diong amo nga indi kun tani paghimuon nga mandatory ang pagbayad sang 3% nga kontribusyon kag kun mahimo nga indi tuman ka taas ang porsyento.
Wala man sila nagapamatok sa ginapatuman sang ahensya apang ang ila lang nga kun tani indi tuman ka dako ang ipabayad sa ila bilang requirement sa pagkuha sang Overseas Employment Certificate.
