ILOILO CITY– Wala pa sang ihibalo ang Maritime Industry Authority kun may yara sang masunod nga batch sang Overseas Filipino Workers nga magapauli sa Iloilo.
Sa interview sang Bombo Radyo kay Maritime Industry Authority 6 Director Jose Venancio Vero, iya ginpahayag nga wala pa siya sang update kun bala may yara sang mga magapauli bangud may yara sang bag-o nga protocol kun sa diin ang repatriates ang nagakadapat nga magpaidalom sa Polymerase Chain Reaction Test sa Metro Manila.
Suno kay Vero, ang ila trabaho sa MARINA amo ang paghatag sang transportasyon sa mga magapauli nga Overseas Filipino Workers lakip na ang Seafarers.
Sa tion nga may yara sang opisyal nga manifesto suno kay Vero, magapakig-angot siya sa Regional Inter-Agency Task Force.
Gin-athag man sang natungdan nga makaisa ka bes lang nga nagtawag sa iya si Iloilo City Lone District Rep. Jam Jam Baronda agud magpangayo sang paathag sa kun ano ang katungdanan sang MARINA sa repatriation.
