May yara na sang rekomendasyon ang Covid team sang syudad kay Iloilo Coity Mayor Jerry Treñas, ini matapos nga nadugangan sang lima ang kaso sang Coronavirus Disease 2019 sa syudad sang Iloilo.
Sa interview sang Bombo Radyo kay Mayor Treñas, iya ginpahayag nga paga-istoryahan pa nila subong nga adlaw ang nasambit rekomendasyon lakip na ang mga plano nila sa syudad bangud sa pagsaka sang kaso sang COVID-19.
Suno kay Treñas, padayon naman ang ginapatigayon nga contact tracing sa mga naka upod sang mga nagpositibo.
Ginpaidalom naman sa quarantine ang pamilya sang mga nagpositibo kag pagasayluhon naman sa ospital ang mga pasyente.
Samtang magahugot naman sang paha ang syudad sang Iloilo bangud sa epekto sang Coronavirus Disease 2019 pandemic sa ekonomiya.
Suno kay Treñas, nakig-istorya na sya sa Finance Committee sang syudad kag may yara na sila sang rekomendasyon nga ginpresentar sa iya kaangay nalang sang pagpa-untat sa pila ka mga aktibidad sang syudad nga ginalakipan sang mga sport activities kag fesivals.
Dugang sang natungdan, indi man anay pagpun-an ang mga bakante nga posisyon sa Iloilo City Hall.
Santo sa pahayag sang alkalde, ginatan-aw man nga buhinan ang working days sang mga job hires lakip man ang pagsuspinde sang pag-implementa sang Salary Standardization Law V sa syudad.
