STA. BARBARA, ILOILO– Dakop ang isa ka pulis matapos nadiskubrehan nga may karga ini nga kinarton sang ilimnon sa sulod sang iya salakyan, sa checkpoint nga ginpatigayun sa Barangay Cabugao Sur, Sta. Barbara Iloilo.
Ang nasambit nga pulis ang ginkilala nga Police Staff Sergeant Paul Pinggoy nga na assign sa Regional Intelligence Division sang Police Regional Office 6 sa Campo Delgado, Iloilo City.
Sa interview sang Bombo Radyo kay Police Major Reymond Celoso, hepe sang Sta. Barbara Muncipal Police Station. iya ginpahayag nga nagapatigayun sang checkpoint ang mga kapulisan sang naglabay ang salakyan nga ginamaneho ni Pinggoy kag namutikan nga halos indi na masarado ang nalikod nga bahin sang salakyan.
Suno kay Celoso, nagpakilala man nga pulis si Pinggoy kag sang ginpamangkot kun ano ang unod sang iya salakyan, ginpahayag pa sini nga tiles ang iya dala.
Pahayag pa sang hepe, sang gin-usisa na sang kapulisan ang unod sang salakyan, didto nadiskubrehan ang 30 ka box sang long neck nga whisky.
Dugang pa sang natungdan, padayun pa ginahibalo kun sa diin dal-on sang amo nga pulis ang nakumpiska nga mga ilimnon.
Sa subong yara na sa Sta. Barbara Municipal Police Station si Pinggoy, kag magapangatubang sang kaso nga paglapas sa article 151 may kaangtanan sa executive order 110 sang Gobernador sang Probinsya.
