ILOILO – Handa ang local government unit (LGU) sang Leon nga batunon ang mga repatriated Overseas Filipino Workers (OFWs) kag strandees nagikan sa nanuhay-tuhay nga bahin sang Pilipinas.
Sa interview sang Bombo Radyo kay Leon Mayor Ma. Lina Holipas, iya ginpahayag nga sang nagligad nga Abril 10, may yara na sang ginbaton nga una nga hugnat sang repatriates ang nasambit nga banwa.
Ginsunod ang tanan nga protocol suno kay Holipas sa diin ginpaidalom ang mga ini sa polymerase chain reaction (PCR) test kag gin-isolate sa sulod sang 14 ka adlaw.
Bangud lunsay negatibo sa coronavirus disease 2019 (COVID-19), ang mga repatriates ang gintugutan nga makabalik na sa ila tagsa ka balay.
Magluwas diri, may yara pa gid sang dugang nga OFWs nga nag-abot duha na ka semana ang nagligad.
Suno kay Holipas, ang kondisyon lang sa mga strandees amo nga magpakig-angot sa Overseas Workers Welfare Administration (OWWA) bangud ang nasambit nga pamunan ang may koordinasyon sa Iloilo Provincial Goverment.
Nagpasalig ang natungdan nga may yara sang maayo nga isolation facility ang banwa kag may relief assistance man nga ihatag ang LGU.
