ILOILO CITY – Gina-ugyunan sang Land Transportation Office ang ginaduso ni Iloilo City Mayor Jerry Treñas nga tugutan ang pag-angkasanay sang mag-asawa sa motorsiklo.
Sa interview sang Bombo Radyo kay Mayor Treñas, iya ginpahayag nga sa iya pagpakighinun-anon kay Director Eric Tabaldo sang Land Transportation Office nagpahayag ini nga luyag man nila mag-apelar sa National-Inter Agency Task Force nga tugutan ang pag-angkasanay sang mag-asawa sa motorsiklo bangud wala sila sang nakit-an nga problema diri.
Nahibaluan nga una na nga nagpadala sang sulat si Treñas sa National-Inter Agency Task Force agud hingyuon nga pahanugutan ang angkas sa magpamilya sa motorsiklo.
Samtang, hulaton pa ni Iloilo Governor Arthur Defensor Jr. ang resulta sang pagsinapol sang National-Inter Agency Task Force may kaangtanan sa pagkonsiderar niya sa pag-angkasanay sang magpamilya ukon mag-asawa sa motorsiklo.
Ini basta sundon lang nila ang pagsulundan kaangay sa pagsuksok sang helmet, pagsuksok sang facemask kag pagdisinfect.
Sa interview sang Bombo Radyo kay Defensor, iya ginpahayag nga pat-ud niya nga gina istoryahan pa ini sang National-Inter Agency Task Force kag handa sya nga amyendaran ang Executive Order nga una na niya ginpapanaog may kaangtanan sa pagpahanugot sa pag-angkasanay sang magpamilya.
Nagdihon naman sang resolusyon ang Sanguniang Panlalawigan may kaangtanan sa nasambit mandu.
Suno kay Second district Board Member Jun Mondejar, makabig nga indi praktikal kag indi man hilway para sa magpamilya kun sa iban pa sila nga salakyan magsakay.
Dugang sang natungdan, nagalaum sila nga maamyendaran ang nasambit nga kasuguan agud gilayon nga mapatuman.
