Gilayon nga ginpaidalom sa mandatory quarantine ang 242 ka mga repatriated Overseas Filipino Workers (OFWs) nga nag-abot sa Western Visayas subong nga adlaw, Mayo 20.
Santo sa data sang Regional Inter-Agency Task Force (RIATF), yari ang breakdown sang numero sang mga repatriates:
AKLAN — 32
ANTIQUE — 13
CAPIZ — 27
ILOILO PROVINCE — 61
ILOILO CITY — 26
GUIMARAS — 7
BACOLOD — 76
Sang nag-abot sa Philippine Ports Authority (PPA), ginpatigayon ang naandan na nga protocol kaangay sang disinfection.
Sa interview sang Bombo Radyo kay Atty. Roy Villa, tagpamaba sang RIATF, iya ginpahayag nga ang repatriates sang iban nga probinsya ang gindala mismo sa ila lugar kag didto na ginpahamtang sa isolation facility samtang ginahulat ang resulta sang polymerase chain reaction (PCR) test.
Suno kay Villa, ang mga repatriates naman sang syudad kag probinsya sang Iloilo ang ginpahamtang sa nakadesignar nga hotel sa syudad sang Iloilo.
PARENTS’ LOVE.
Samtang, ginpakigbahin sang mag-asawa ang ila kalipay subong nga nakapauli na ang ila duha ka anak.
Sa interview sang Bombo Radyo kay Mellardo Sudario sang Sta Barbara, Iloilo, iya ginpahayag nga nagatrabaho sa isa lang ka barko ang iya duha ka anak.
Marso 24 sang nag-abot ang mga ini sa Manila kag naabtan sang lockdown.
Suno kay Sudario, personal gid sila sang iya asawa nga nagpadulong sa PPA agud makit-an ang pag-abot sang mga repatriates.
Bangud sa health protocol, nakontento na lamang si Sudario kag ang iya asawa sa pag-wave sa ila kabataan nga nagsakay man sa barko nga St. Leo the Great.
A WIFE’S LOVE.
Sa interview sang Bombo Radyo kay Rio Gumapal, asawa sang isa ka seafarer nga nadala man sa repatriation, iya ginpahayag nga personal gid siya nga nagpadulong sa PPA agud masaksihan ang pag-abot sang iya bana.
Suno kay Gumapal, nag-abot sa Manila ang iya bana nga si Rene sang Abril 27 kag ginpaidalom man sa quarantine kag gintatap sang ila kompaniya.
Suno kay Gumapal, natigayon ang repatriation bangud sang koordinasyon sang kompaniya sa Overseas Workers Welfare Administration (OWWA) nga amo ang lead agency sang repatriation sang mga OFWs kag strandees.
