ILOILO CITY – Ginatindugan sang Department of Education (DepEd) Western Visayas ang desisyon sang National Inter-Agency Task Force nga buksan ang klase para sa mga estudyante sa Agosto subong nga tuig apisar sang coronavirus disease 2019 (COVID-19) pandemic.
Sa interview sang Bombo Radyo kay Dr. Lea Belleza, tagpamaba sang DepEd Region 6, iya ginpahayag nga ini nga desiyon ang ginbase man sa rekomendasyon sang mga national officials kag approval ni Presidente Rodrigo Duterte.
Sang damlag lang, nagpabutyag sang pagpamalabag sanday Iloilo Governor Arthur Defensor Jr. kag Iloilo City Mayor Jerry Treñas sa pag-resume sang klase sa Agosto 24 bangud sang ginasuprer nga pandemya.
Ginpahayag ni Defensor nga mahimo lamang magbalik ang klase kun ‘zero’ na ang COVID-19 cases sa Pilipinas, kag kun indi man lang mapat-od ang epidemiology sang virus, mas maayo nga ibutang sa ‘siguro’ ang ikaayong lawas sang mga kabataan.
Samtang, suno naman kay Treñas, tuman ka budlay para sa mga kabataan nga masunod ang mga health protocols partikular na ang physical distancing gani mas mataas ang risgo sang pagkontaminar sa virus.
May kaangtanan diri, ginpahayag ni Belleza nga ini nga mga opinyon sang local chief executives ang gina-respeto sang pamunuan apang madayon sa gihapon ang klase suno sa iya, MAGLUWAS lang kun may yara sang “further pronouncements” nagikan sa National IATF.
Nagpasalig man si Belleza nga handa DepEd Western Visayas sa pagbukas sang klase sa Agosto.
Suno sa natungdan, madamo ang preparasyon nga ginahimo sang pamunuan kaangay sang school readiness survey sa diin ginahibalo ang internet connectivity sang mga kabataan sa ila lugar kag kun sin-o ang mahimo mapakadto sa eskwelahan para sa “face to face” nga klase.
May yara man sang trainings para sa manunudlo nga maga-umpisa sa Hunyo.
May kaangtanan sa ikaayong lawas sang mga kabataan, suno kay Belleza, sundon ang health protocols kaangay sang disinfection, physical distancing, kag pagsuksok sang face mask. #
