ILOILO CITY – Nagpanindugan ang Police Regional Office (PRO) 6 nga indi ‘state-sponsored terrorism’ ang pagkadalahig sang duha ka pulis sa twin shooting incident sa syudad sang Iloilo sang nagligad nga Enero.
Kun balik-balikan ang imbestigasyon sang National Bureau of Investigation (NBI), may apat ka mga suspek nga amo ang nagluthang-patay kanday Allain Muller kag Delfin Britanico sang Enero 19, Domingo.
Duha sa mga suspek amo sanday PCPL. Jerry Villanueva kag PCPL. Joseph Andrew Joven.
Sa interview sang Bombo Radyo kay PRO6 Director PBGen. Rene Pamuspusan, iya ginpahayag nga wala ginasuportahan sang kapulisan ang amo nga akto kag indi matuod ang espekulasyon sang iban nga tawo nga lunsay pulis ang yara sa likod sang pagpangluthang ilabi na kun may kaangtanan sa droga ang biktima.
Gindugang pa ni Pamuspusan nga wala nagapabaya ang pamunuan bangud gilayon nga ginpaidalom sa ‘restricted custody’ si Villanueva.
Gin-athag man sang natungdan nga ginpasakaan na sang duha ka kaso administratibo si Joven matapos wala ini nagpaidalom sa drug test nga ginpatigayon sang Iloilo City Police Office (ICPO) sang tinalikdan nga Marso. Ini nga mga kaso amo ang Grave Neglect of Duty ukon Absent Without Leave kag Less Grave Neglect of Duty.
“MAY GRUPO BALA SANG PULIS NGA NAGAPAMATAY?”
May kaangtanan sa ginapahayag sang kadam-an nga may yara sang grupo sang kapulisan nga amo ang nagapamatay, ginpahayag ni Pamuspusan nga kinahanglan nila ang mabaskog nga ebidensya.
Bukas ang pamunuan para sa imbestigasyon suno sa opisyal.
“NBI, MAS MADASIG MAG-SOLVE IPAANGGID SA PULIS?”
Gindepensahan man ni Pamuspusan ang Iloilo City Police Office (ICPO) may kaangtanan sa nangin dalagan sang imbestigasyon halin sang Enero kag kun ngaa nauna pa nga natumod sang NBI ang mga suspek.
Suno sa natungdan, may ginpatigayon man nga imbestigasyon ang ICPO sa pagpanguna ni PCol. Eric Dampal apang “natabuan lang nga may yara sang pandemic” rason nga may kaagaw sa focus sang operasyon.
Natabuan man suno sa natungdan nga ang lead sang NBI ang nagresulta sa opening sang nasambit nga kaso.
Sa pihak sini tanan, nagapati si Pamuspusan nga daku man ang nabulig sang ICPO sa NBI agud matumod ang mga suspek sa amo nga twin shooting incident.
#
