NEW LUCENA, ILOILO– Ginkakibot sang Alkalde sang New Lucena, Iloilo nga may yara sang programa sa ila banwa ang Department of Social Welfare and Development VI, sa diin, may yara sang ginapanghatag nga P1,000 sa mga pumuluyo nga wala nadala sa Social Amelioration program.
Sa interview sang Bombo Radyo kay New Lucena Mayor Liecel Mondejar Seville, iya ginpahayag nga nakibot siya nga may nasambit nga programa ang DSWD,bangud wala man sang may nagpakig-angot sa iya opisina.
Suno kay Seville, may yara sang mga nagapanangkot sa iya kun ngaa wala sila nakabatun sang P1000, rason nga nagpangusisa siya sa DSWD, kag didto niya nahibaluan nga may yara sang kaangay nga programa.
Pahayag pa niya, kuntani ginapahibalo man sa iya bilang alkalde, kun may yara sang mga ginapatuman nga programa sa banwa sang New Lucena.
Luyag man niya mahibaluan suno kay Seville, kun sin-o ang yara sa likod sang pagfacilitate sang amo nga programa, bangud nagapati siya nga may yara sang politiko nga kontra partido sa likod sang amo nga lihok.
Dugang pa sang natungdan, ginapaligban niya sa subong kun sa diin nagkuha sang listahan ang DSWD sang mga wala nadala sa Amelioration, bangud nagakadapat nga nga sa banwa mismo kuhaon ang listahan.
