ILOILO CITY– Padayun nga ginpatuman sa mga merkado sa palibot sang syudad sang Iloilo ang mga health protocols para man sa seguridad sang tanan nga nagabaligya kag nagapamalaklon.
Sa interview sang Bombo Radyo kay Local Economics Enterprise Office Officer-in-charge Maricel Mabaquiao, iya ginpahayag nga apisar ginbuksan na ang tanan nga mga pwertahan sa tagsa ka mga merkado sa syudad, apang lain sa gihapon ang entrance kag exit sang mga tawo.
Suno kay Mabaquiao, ginapatuman man sa tagsa ka mga merkado ang physical distancing, paggamit sang facemask,kag paggamit sang alcohol kag iban pa nga disinfection.
Magluwas sa mga uniformed personnels kag iban pa nga enforcers, may yara man sila suno sa iya sang ginpahamtang nga mga tarpaulin sa tagsa ka pwertahan sa merkado, agud ipahanumdum sa mga pumuluyo ang mga health protocols nga nagakadapat sundon.
Samtang sa bahin naman sang schedule sang merkado subong nga Modified General Community Quarantine, magabukas ini las 4:30 sang aga tubtob las 8:00 sang gab-i.
