ILOILO CITY – Gina-abi sang Department of Education (DepEd) Division of Iloilo City ang suporta nagikan sa nanuhay-tuhay nga grupo partikular na sa implementasyon sang Basic Education, Learning Continuity Plan (BE-LCP) nga ipatuman sa opisyal nga pagbukas sang klase sa Agosto 24.
Ini ang ginalauman nga bulig sang pamunuan kasunod sang virtual kick-off ceremony sang “Brigada Eskwela” nga ginpatigayon kahapon, Hunyo 5.
Sa interview sang Bombo Radyo kay Dr. Luz de los Reyes, superintendent sang Division of Iloilo City, iya ginpahayag nga lain ang Brigada Eskwela subong nga tuig ipaangid sa naandan nga programa sa diin may yara sang mga pagpaninlo nga ginahimo sa mga classroom kag sa palibot sini.
Subong nga school year suno kay de los Reyes, nagaapelar ang Department of Education sa mga ginikanan, estudyante, kag volunteers nga magbulig sa pagpanghanda kag sa pagpabaskog sang partnership agud mapadayon ang pagtuon sang mga estudyante apisar sang coronavirus disease (COVID-19) pandemic.
May kaangtanan diri, ginahingyo ang mga eskwelahan nga magtipon sang mga materyales agud magamit sang mga estudyante kag personnel.
Lakip sa sini nga mga kinahanglanon amo ang thermal scanner, hand-sanitizing materials kaangay sang rubbing alcohol kag habon, face masks, multivitamin capsules, kag tablets kag syrups.
Gina-engganyo man ang pag-print sang information material para sa COVID-19 kag mga pamaagi agud malikawan ang balatian.
Lakip man sa ginalauman nga matipon amo ang suplay sang bond papers, work sheets, notebooks, kag iban pa agud magamit sa pagpanatag sang learning materials sa mga kabataan.
Gin-athag man sang natungdan nga kun may yara sang luyag magdonar sang cash, mahimo ini ipaagi sa Parents-Teachers Association (PTA).
HANDA NA BALA ANG SYUDAD SANG ILOILO?
May kaangtanan naman sa pagpatigayon sang enrollment, ginpahayag ni Dr. de los Reyes nga ang mga manunudlo na ang nagapakig-angot sa mga ginikanan agud ikumpirmar ang registration sang ila anak.
Ini nga proseso suno sa natungdan ang ginapaagi sa text message ukon sa email.
Sa pamangkot kun bala handa na ang Division of Iloilo City sa pagpatigayon sang online learning sa pagbukas sang klase sa Agosto, ginpahayag sang opisyal nga ginahimo nila ang tanan agud ma-provide ang ginakinahanglan sang kabataan kag pamunuan.
