ILOILO CITY – Kontento si Punong Barangay Johnny Lego sang Lopez Jaena Sur, La Paz, Iloilo City sa nangin resulta sang consultative meeting nga ginpatigayon kahapon, Hunyo 5.
Sa interview sang Bombo Radyo kay Lego, iya ginpahayag nga napautwas nila ang hibubun-ot kag nagasalig nga matuman ang ginkasugtan.
Suno kay Lego, nagpasalig si Public Safety and Transportation Management Office head Jeck Conlu nga indi na pagdakpon ang barangay tricycle patrol apisar nagaagi sa national highway apang limitado lang sa emerhensya.
May kaangtanan sa ginahingyo sang Punong Barangay nga disciplinary action batok sa traffic auxiliary nga ginapahayag arogante nga nagdakop sa tanod commander nga nagamaneho sang barangay tricycle patrol sang Mayo 27, ginpahayag ni Lego nga may yara na sang silot nga ginhatag.
Ginpahayag ni Lego nga paagi sa pagsinapol, nahangpan sang tanan nga may kakulangan ang magtimbang nga bahin.
May kaangtanan naman sa pahayag nga naga-waslik poder ang mga punong barangay sa ginhimo nga letter of condemnation, ginpahayag ni Lego nga wala ini sang kamatuoran.
Suno sa Punong Barangay, ginhimo lang nila ang katungdanan bilang mga opisyal kag wala sila nagapamersonal.
#
