ILOILO CITY – Pangunahan sang Archbishop of Jaro nga si Most Reverend Jose Romeo O. Lazo, D.D. ang pagpatigayon sang Healing Rosary for the World ‘las nueve bwas sa gab-i, Hunyo 10.
Ang Healing Rosary for the World isa ka weekly prayer initiative sang The Manila Cathedral kaupod ang nagkalain-lain nga dioceses sa bilog nga Pilipinas.
Sa interview sang Bombo Radyo kay Father Angelo Colada, director sang Archdiocesan Commission on Social Communications, iya ginpahayag nga iga-live stream nagikan sa Jaro Metropolitan Cathedral kag National Shrine of Our Lady of Candles ang amo nga rosaryo.
Suno kay Father Colada, ang rosaryo ang ipatungod sa pagtapna sang coronavirus disease 2019 (COVID-19) nga nag-infect sang 7.1 milyon ka tawo sa bug-os nga kalibutan kag nagpatay sang masobra 400,000.
Ginpahanumdom ni Colada ang publiko nga importante ang pagpangamuyo kag indi dapat pag-untatan ilabi na samtang ginasuprer nga global pandemic kun sa diin wala pa sa gihapon sang nadiskubrehan nga bulong.
Lauman nga maga-lawig sang 30 tubtob 45 minutos ang rosaryo.
Ang Healing Rosary for the World ang iga-cover live sang Bombo Radyo Iloilo.
#
