MANILA– Ginpanindugan sang Department of Justice nga tun-an sa kutob sang ila masarangan ang ginaduso nga Anti-Terrorism bill.
Suno kay Justice Secretary Menerdo Guevarra, iga-review nila ang nasambit nga hagna kun sa diin ila pagahatagan sang pagtamod ang seguridad sang pungsod lakip na ang civil kag political nga kinamatarung sang mga pumuluyo.
Ginpahayag ni Guevarra nga ginpangabay ang Department of Justice nga magpasa sang kumento sa Office of the President sa Miyerkules Hunto 17.
Nahibaluan nga tinutuyo sang nasambit nga hagna amo ang paghatag sa government forces sang dugang nga gahom batok sa mga ginadudahan nga terorista.
Madamo naman nga mga kritiko ang nagpamatok sa Anti-Terrorism Bill bangud sa ginapahayag delikado nga probisyon kaangay sang pagpalawig sang pagkapreso nga wala man sang may ipasaka nga panumbungon lakip na ang pag-tag sa isa ka tawo ukon grupo bilang mga terorista.
