ILOILO CITY- Ipasaka ni Iloilo City Mayor Jerry Treñas sa National Office sang Department of Interior and Local Government ang complaint batok sa Bureau of Fire Protection Region 6.
Ini may kaangtanan sa pagpositibo sa Covid-19 sang personnel sang Bureau of Fire Protection apang nagpanglugayawan pa sa Boracay kag gintago pa sang ahensya ang pila ka importante nga impormasyon tuhoy sa iya.
Sa interview sang Bombo Radyo kay Mayor Treñas, iya ginpahayag nga sa subong, ginahulat nalang niya ang resulta sang imbestigasyon sang Iloilo City Police Office sa pagpanguna ni Police Colonel Eric Dampal nga amo ang mangin basehan sang ipasaka nga complaint sang alkalde.
Nahibaluan nga nagpatigayon sang pagsinapol ang covid-19 team sang Iloilo City upod sa Regional Inter-Agency Task Force kahapon, Hunyo 16.
Sa nasambit nga pagsinapol, natukiban man nga si Patient no. 144 nga isa ka 26- anyos nga BFP personnel kaupod ang kapin 30 ka iban pa lakip na diri si Regional Director Fire Senior Supt. Roderick Aguto ang nagtinir sa isa ka hotel sa Boracay nga indi accredited sang Department of Tourism nga suno kay Treñas, isa ka violation.
Magluwas diri, wala man nakasulat sa manifesto ang nasambit nga pasyente sang nagbiya ini sa Boracay.
Samtang, ginpahayag naman sang alkalde nga tubtob subong, wala pa nakapakig-angot sa iya ang Bureau of Fire Protection Region 6 agud nga magpaathag sang ila nga bahin.
