DUMANGAS – Plastado ang quarantine facilities sa banwa sang Dumangas agud maakomodar ang nagaabot nga Locally Stranded Individuals (LSIs).
Sa interview sang Bombo Radyo kay Dumangas Mayor Ronaldo “Onal” Golez, iya ginpahayag nga napahamtang ang municipality quarantine facility sa Brgy. Cayos sa amo nga banwa kun sa diin nabaklan na nga daan sang nagakaigu nga mga equipment agud indi mabudlayan ang magatinir.
Magluwas diri, ginpahayag ni Golez nga gintinguhaan sang local government unit nga mas mapahapos ang sitwasyon para sa Locally Stranded Individuals kag sa ila tagsa ka pamilya rason nga gin-tap man ang mga barangay agud magdesignar sang pasilidad.
Gingamit suno sa natungdan ang day care kag health centers, samtang kun gutok naman, ginagamit ang barangay gym sa diin may yara sang napahamtang nga portable tents.
Sa subong, naglab-ot na sa masobra 300 ka Locally Stranded Individuals ang nag-abot sa amo nga banwa apang ang iban suno ka Golez ang nakapauli naman sa ila balay bangud natapos na ang 14-day quarantine period.
