ILOILO CITY – Nagsaka na sa walo ka doktor sa St. Paul’s Hospital of Iloilo ang nagpositibo sa coronavirus disease 2019 (COVID-19).
Sa interview sang Bombo Radyo kay Iloilo City Mayor Jerry Treñas, iya ginpahayag nga nagapati siya nga local transmission ang natabo kag may paglapas sa medical protocols sang nasambit nga ospital.
May kaangtanan diri, magasapol ni Mayor Treñas sa tanan nga director kag administrators sang nanuhay-tuhay nga ospital sa syudad amo man sa Regional Inter-Agency Task Force agud maistoryahan ang mga lihok kag agud malikawan ang pagluntad sang kaangay nga hitabo.
Suno kay Treñas, ginpatigayon naman subong nga adlaw ang swab testing sa mga personnel nga naka-close contact sang mga COVID-19 positive nga mga doktor.
“PADAYON PA ANG CONTACT TRACING.”
Suno naman kay Atty. Roy Villa, tagpamaba sang Regional Inter-Agency Task Force, wala pa sang data subong kun pila gid ang naka-close contact sang mga COVID-19 positive nga mga doktor.
Ginpahayag ni Villa nga nagapadayon pa ang active contact tracing kag ang imbestigasyon may kaangtanan sa ginapahayag nga local transmission.
Kun sundon ang yara sa guidelines sang task force suno sa opisyal, nagakadapat nga kuhaan sang swab sample ang tanan nga tawo nga yara sa lugar nga gin-lockdown lakip na ang mga nagabantay sang pasyente.
Indi lang matumod ni Villa kun unahon sa pag-test ang mga naka-close contact ukon ang kabug-usan nga staff sang amo nga ospital.
