ILOILO CITY- Nagawangal ang mga pumuluyo sang Bo. Obrero,Lapuz, Iloilo City nga nagatinir sa evacuation center kasunod sang natabo nga oil spill tuga sang paglupok sang power barge sang AC Energy Corporation sa nasambit nga lugar.
Sa interview sang Bombo Radyo Iloilo kay Eden Lacap, isa sa mga evacuees, iya ginpahayag nga tuman ka kulang ang gina-rasyon nga pagkaon sa ila.
Suno kay Lacap, delayed man ang pagdul-ong sang pagkaon rason nga ginaligaran na sila sang gutom.
Suno naman kay Manang Inday, isa man sa mga evacuees, indi man ini kumporme sa linuto nga gina-provide sang korporasyon.
Pahayag niya, basi maglala pa ang iya balatian bangud tuman ka maasin ang mga linuto nga ginahatag sa ila.
Ginpahayag naman ni Florenda Espora, daycare worker 1 sang City Social Welfare and Development Office, may gina-provide man nga pagkaon ang Syudad sang Iloilo paagi sa community kitchen.
Ginkumpirma naman ni Iloilo City Mayor Jerry Treñas nga AC Energy Corporation ang nagahatag sang pagkaon kag ang syudad amo ang nagaluto.
Sa subong suno sa alkalde, apat na ang evacuation centers para sa mga apektado nga pumuluyo kag plano sang alkalde nga magpahamtang sang community kitchen sa kada evacuation center para mas mahapos ang pagrasyon sang pagkaon.
