ILOILO CITY- Ginapasulabi sang Iloilo City Government ang paghatag sang tanan nga kinahanglanon sang mga apektado nga pumuluyo kasunod sang nagluntad nga oil spill tuga sang paglupok sang power barge sang AC Energy Corporation sa Bo. Obrero, Lapuz, Iloilo City.
Sa interview sang Bombo Radyo kay Mayor Jerry Treñas, iya ginpahayag nga dapat unahon ang sitwasyon subong sang mga pumuluyo agud mahatag ang ila pang-adlaw-adlaw nga kinahanglanon labaw sa paghatag atensyon sang kompensasyon nga dapat ihatag sang korporasyon sa mga pumuluyo.
Suno kay Mayor Treñas, indi madali-dali ang paghatag sang kompensasyon para sa natuga nga damages bangud nga kwalipikado nga mga tawo ang dapat maghimo sang computation kag mahimo nga maglawig pa ini sang pila ka semana ukon binulan.
