ILOILO CITY – Ginapasigurado sang Iloilo City Government nga hatagan sang prayoridad ang ikaayong lawas sang mga residente nga naapektuhan sang oil spill matapos naglupok ang power barge sang AC Energy sa Bo.Obrero, Lapuz, Iloilo City.
Sa exclusive interview sang Bombo Radyo Iloilo kay Iloilo City Councilor Alan Zaldivar, chairman sang Comittee on Health, Sanitation and Hospital Services sang Iloilo City Council, iya ginpahayag nga nakig angot na siya sa City Health Office agud masigurado nga nagpatigayon sang consultation sa mga apektado nga residente ilabi na sa mga kabataan kag tigulang.
Suno kay Zaldivar, dako ang epekto sa respiratory system sa tion nga mahaklo ang bunker fuel.
Nagpanugyan man ang konsehal sa mga pumuluyo nga magsuksok sang protective equipment kag likawan ang pagpadulong sa baybayon samtang may yara pa sang oil spill.
Sa bahin naman sang mga residente nga gin-hire sang nasambit nga kumpaniya agud magpatigayon sang scooping sang bunker fuel, ginpanugyan man sang natungdan nga nagakadapat nga magsuksok ang mga ini sang personal protective equipment.
Sa subong masobra na sa 60 ka mga pamilya ang yara sa mga evacuation centers.
