ILOILO CITY- Nagapadayun ang programa sang Bureau of Jail Management and Penology VI agud mas mapanami pagid ang serbisyo kag pasilidad para sa mga persons deprived of Liberty.
Sa interview sang Bombo Radyo kay Jail Senior Superintendent Baby Noel Montalvo, Regional Director sang
Bureau Of Jail and Management and Penology Region 6, iya ginpahayag nga may yara na sang mga jail facilities kag building nga gintukod agud indi na magginutok ang mga inmates.
Suno kay Montalvo, magluwas sa pasilidad, padayun man ang mga video conferencing meeting agud makagwa ang mga preso nga natalana na nga mahilway matapos ma serbisyuhan ang ila sintensya.
Sa bahin naman sang programa kontra sa Coronavirus Disease 2019 (COVID-19), may yara sang tatlo ka cloth masks nga ginahatag ang BJMP sa mga inmates agud ila magamit, may yara man sang alcohol kag iban pa nga mga disinfectants nga ginahatag agud masigurado nga matinlo kag luwas sa virus ang palibot.
Pahayag pa niya, ginaseparar man ang mga may edad, agud indi maglala ang ila sitwasyon kag kun may yara sang emerhensya, may proseso man nga ginasunod.
Nagapangayo man sang kooperasyon sang komunidad ang nasambit nga ahensya agud matigayun ang iban pa nga programa para sa kaayuhan sang mga persons deprived of liberty.
