ILOILO CITY – Nagalalain ang mga residente sang Zone 2. Bo.Obrero, Lapuz, Iloilo City matapos gin-lockdown ang ila mga pamalay bangud sa pagpositibo sa COVID-19 sang isa ka magpamilya sa diin napatay ang amay.
Sa exlusive interview sang Bombo Radyo kay alyas Budo, residente sang nasambit nga lugar, iya ginpahayag nga tuman kabudlay sang ila sitwasyon matapos nadala ang iya balay sa 66 ka mga puluy-an nga gin lockdown sa ila barangay.
Suno kay Budo, matrabaho pa siya kuntani, apang bangud sa lockdown, indi na siya makagwa sa ila balay.
Ginpahayag sang natungdan nga kagabi lang sila ginpabalo nga may lockdown.
Isa man sa ginareklamo nila amo nga wala sila ginhatagan sang food packs sa diin nalampasan lang sang panyaga apang wala sila nakakaon.
Nahibaluan nga tatlo ka adlaw nga naka lockdown ang mga pamalay sa lugar.
Ini matapos nga nagpositibo sa Coronavirus disease 2019 (COVID-19) ang isa nila ka residente nga si WV 679, 80 anyos kag ginbawian sang kabuhi.
Sa ulihi, nagpositibo man sa COVID-19 ang asawa sini nga si WV 821, 71 anyos kag anak nga si WV 820, 39 anyos nga sa subong nagapabilin sa quarantine facility.
