ILOILO CITY – Liwat naman nga ipatuman ang liquor ban sa Syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga maga umpisa ang liquor ban bwas, Agusto 4, 2020.
Suno kay Treñas, ang nasambit nga desisyon ang nakasugtan sang COVID Team sang Iloilo City Government.
Ginpanugyan man sang alklade nga samtang ginpatuman ang liquor ban, mas maayo nga softdrinks lang anay ang imnon.
Gin-athag man sang alkalde nga ang pag-inom lang sa pampubliko nga lugar ang dumilian kag indi na sakop ang mga naga inom sa sulod sang tagsa ka balay.
Nahibaluan nga nag ugat ang desisyon sang alkalde matapos nagtaas ang kaso sang local transmission sa Syudad sang Iloilo sa diin kalabanan sa mga pasyente ang nalatnan sang COVID-19 bangud sa pag-inom sa mga pampubliko nga lugar.
