PAVIA, ILOILO – Nagalalain si Pavia, Iloilo Councilor Jose Maria ‘Pyt’ Trimañez matapos wala ginpasugtan nga sugaton sang ambulansya nga ginapanag-iyahan sang ila banwa agud kun tani magpa-quarantine.
Sa exclusive interview sang Bombo Radyo kay Trimañez, iya ginpahayag nga nagdesisyon siya nga magpa-quarantine matapos naka-angkon sang close contact sa isa ka COVID-19 positive.
Suno kay Trimañez, Hulyo 29 sang naka-istorya niya ang COVID-19 positive apang Agusto 7 na siya nakahibalo nga may virus ang nasambit nga persona.
Agusto 8 sang nagpaidalom si Trimañez sa reverse transcription polymerase chain reaction (RT-PCR) test upod sang iya tiayon kun sa diin nag-negatibo man ang ila resulta.
Ang ginalain sang buot sang konsehal amo ang ginapahayag pagpamalabag sang iya pakaduha nga si Mayor Laurence Anthony ‘Luigi’ Gorriceta nga sugaton siya sang ambulansya sa atubang sang munisipyo.
Mismo si Pavia Municipal Health Officer Dr. Joyous Jan Santos ang nagkumpirma nga ang alkalde ang nagmando nga indi pagsugaton sang ambulansya si Trimañez sa kahadlok nga mabutang naman sa kontrobersiya ang ila banwa.
Sa subong naka quarantine pa si Trimañez sa distrito sang Lapaz sa Syudad sang Iloilo.
