Kun may problema ang mga tawo sa tubig, natural lang nga mabatian mo ang wangal diri kag wangal didto bangud isa ini sa aton nagapanguna nga kinahanglanon adlaw-adlaw.
Mahimo pa gani nga magsaylo pa kamo sang balay kun tuman gid ka pigado ang tubod sang tubig sa inyo ginatiniran nga lugar!
Apang didto sa Bihar sa eastern India, isa ka tigulang ang ginbansagan nga “Canal Man” matapos ginpahayag nga 30 ka tuig na siya nga nagakutkot sang 3 ka kilometro nga water canal agud lamang masolusyunan ang kakulang sa tubig sa ila komunidad.
Ang lalaki amo si Laungi Bhuiyan, nagapuyo sa isa ka nabukid nga bahin sa Kothilawa sa Gaya district kun sa diin tuman ka gamay ang suplay sang tubig bangud nagadiretso sa suba ang tubig-ulan.
Agud madala ang tubig malapit sa iya balay, nadesisyunan ni Laungi nga gamiton ang bisan ano lang nga tools sa ila balay agud makakutkot sang 4 ka tapak nga kalapadon kag 3 ka tapak nga kadalumon nga kanal.
Wala sang bisan isa nga nagbulig kay Laungi, apang nagapati siya nga paagi sa iya tumalagsahon nga kapisan, mangin bugana gid ang suplay sang tubig sa ila komunidad kag makasagod sila sang mga sapat kag tanom nga wala sang problema sa tubig.
Kilala subong ang nasambit nga lalaki sa India kag nagahingyo ang mga netizens sa mga sektor kag gobyerno nga suportahan siya sa iya nga gina-obra para sa water canal. #
