ILOILO CITY – Temporaryo nga ginpa-untat sang Regional Inter-Agency Task Force (RIATF) for COVID-19 ang pagbaton sang mga locally stranded individuals (LSIs) padulong sa Guimaras.
Santo sa Resolution No. 48 Series of 2020, gin-aprubahan sang National Inter-Agency Task Force (NIATF) ang hingyo sang Guimaras Provincial Government nga 7-day moratorium sa pagpauli sang mga LSIs sa probinsya.
Nagakahulugan nga umpisa Oktubre 19 tubtub Oktubre 25, indi anay magbaton ang Guimaras sang mga mapauli nga LSIs.
Katuyuan sini nga mahatagan sang ligwa ang Probinsya sang Guimaras para sa assessment, repositioning kag pagconsolidate sang ila mga resources nga limitado lang.
Sa Oktubre 26, liwat naman nga magabaton ang Probinsya sang Guimaras sang mga LSIs.
Ang resolution ang pirmado naman ni Juan Jovian Ingeniero, Regional Director sang Department of Interior and Local Government (DILG) Region 6 kag Chairperson sang RIATF kag Dr. Marlyn Convocar, Regional Director sang Department of Health Region 6 kag Vice Chairperson sang Western Visayas Inter-Agency Task Force – Emerging Infectious Diseases Health Cluster.
