Nagsaka sa 24 ang ginreport nga napatay kag kapin 26,000 ang gin-evacuate bangud sang padayon nga pagbaha sa Cambodia.
Suno kay Seak Vichet, tagpamaba sang National Committee for Disaster Management (NCDM), 19 sa mga syudad kag probinsya sa amo nga lugar ang nakaeksperyensya sang pagbaha umpisa sini nga bulan.
Kapin 213,000 ka mga residente ang apektado.
Ang pinakamalala nga naigu sang pag-ulan kag pagbaha amo ang mga probinsya sang Pursat, Battambang, Banteay Meanchey kag Kandal kag amo man ang Phnom Penh.
Nahalitan ang 51,133 ka mga balay kag 12,958 ka ektarya sang mga pananom.
Apektado man ang transportasyon bangud ginsiradhan ang mayor nga mga dalanon.
Nahibaluan nga sa tunga-tunga sang Agusto kag Oktubre masami nga nagakaeksperyensyahan ang lapnagon nga baha sa Cambodia.
Sang nagligad nga tuig, ang baha ang nagbilin sang 30 ka patay, walo ang patay sa bagyo, kag 131 ang napilasan.
