GUIMARAS – Nagsabat ang Municipal Administrator sang Buenavista, Guimaras sa reklamo sang pila ka residente sang Barangay San Miguel sa amo nga banwa may kaangtanan sa wala pa nag-abot nga ayuda kasunod sang natabo nga oil spill sang tinalikdan nga Hulyo.
Matandaan nga sa ginpalab-ot nga isyu sa Bombo Radyo Iloilo, ginpahayag nga nagpositibo sa COVID-19 si Mr. Richard Gaboy nga amo ang gindesignar nga mag-follow up sa mga papeles sang claimants kag gin-alegar nga pagkatapos sang iya nga mandatory quarantine, wala na ini nakapakita pa sa mga pumuluyo.
Sa interview sang Bombo Radyo kay Gaboy, iya ginpahayag nga Setyembre 1 pa lang, naubos na pasa ang tanan nga dokumento sang mga residente sa law firm nga amo ang gindesignar sang AC Energy nga mag-evaluate kun ano ang kulang.
Suno kay Gaboy, wala na sang follow-up nga ginhimo ang mga abogado gani gindumdom man sang mga opisyal sa local government unit nga pending pa ang mga dokumento bangud maathag man nga indi ini madali-dali sa pag-evaluate bangud linibo ang mga papeles.
“Ang tanan nga papeles ginconsolidate namon kag ginforward didto sa abogado nila. Nakuha diri sa opisina sang September 1 pa. Sa subong wala man sila coordination ukon inquiry sa amon so we presume nga ongoing pa ang ila evaluation nila… considering nga thousands of documents nila. Indi man lang ato pulo lang ka documents. It will take time to evaluate and validate sa information nga ginprovide nila para macompensate man kun ano ang dapat i-compensate sang AC Energy.”
Indi man matuod suno sa iya nga ‘nangindulaan siya’ pagkatapos sang iya quarantine bangud direkta man siya nga nagreport sa opisina matapos nga nakarecover sa COVID-19.
Gin-athag man ni Gaboy nga bisan ang mga pumuluyo sa worst-hit coastal barangays sa Buenavista ang wala pa nakabaton sang ayuda halin sa AC Energy.
Una naman nga nagpasalig ang AC Energy (paagi kay Gabino Ramon Mejia, pinuno sang plant operations sang AC Energy Philippines) nga i-follow up sang talatapan ang mga reklamo sang mga apektado nga residente kag ila pa iga-check sa law firm kun ano ang problema.
