ILOILO – Nagresign na sa pwesto ang empleyado sang Iloilo State College of Fisheries (ISCOF) sa Dingle, Iloilo nga amo ang ginaalegar nagpeke sang iya nga reverse transcription polymerase chain reaction (RT-PCR) test result.
Ang empleyado ang ginkilala nga si Fredda Lou Amias, isa ka administrative assistant.
Sa interview sang Bombo Radyo kay Dr. Tessie Ortizo, administrator sang amo nga eskwelahan, iya ginpahayag nga Oktubre 19 sang iya nabaton ang resignation ni Amias apang tubtob subong, indi ini mag-ako nga ginpeke niya ang iya nga swab test result.
Nagapanindugan ang staff suno kay Ortizo nga halin sa Western Visayas Medical Center ang amo nga resulta nga iya ginpasa sa ila Human Resource Department.
Matandaan nga ang ginpasa nga test results ni Amias sa ila nga talatapan ang may logo sang Western Visayas Medical Center kag Department of Health (DOH) kag pirmado nanday Arriane Sibal, Abigail Joy Pastolero, Andres Miranda, kag Pierre G. Layson nga una na gin-athag sang WVMC nga indi ila empleyado kag indi man sang DOH.
Sa subong suno kay Ortizo, ginahulat na lang ang imbestigasyon sang fact-finding committee kag ini ang igapasa sa ila nga top management para sa nagakaigu nga akto.
Samtang suno naman kay Aris Bañares sang National Bureau of Investigation (NBI) Region 6, ginpa-check na ang security camera footages sang WVMC apang wala nakit-an si Amias nga nakapadulong sa amo nga laboratoryo agud magpakuha sang swab sample.
Wala man ginadula ang posibilidad sa pagpasaka sang kaso batok kay Amias bangud sang ginapahayag falsification of documents and misrepresentation.
