ILOILO – Padayon pa ang assessment sang local government unit (LGU) sang Alimodian sa nahalitan sang landslides nga nagluntad sa amo nga banwa kadungan sang malain nga tiyempo kag pagbubo sang mamunog nga ulan subong nga semana.
Sa interview sang Bombo Radyo kay Mayor Gefree ‘Calay’ Alonsabe, iya ginpahayag nga santo sa inisyal nga report sang mga punong barangay, lima na ka mga area ang apektado kag ini amo ang Barangay Ginomoy, Tabug, Cunsad, Malamhay, kag Tugaslon.
Suno sa alkalde, isa ka balay ang nawasak gid sa Barangay Tugaslon kun sa diin 6 ka tawo ang nagapuyo.
Lima man ka balay ang apektado (30 ka indibidwal).
Nangin daku man nga huol ang tuga sang pagkautod sang dalan kag pag-usmod sang duta sa mayor nga dalan sa Barangay Ginomoy.
Ang mga residente sang 70% sang upland barangays sa amo nga banwa ang nagaagi sa amo nga dalan suno kay Alonsabe.
Bangud sang natabo, madamo ang nastranded kag nagmato-mato na lang ang mga tawo sa paghakwat sang ila mga dala kag inugbaligya nga produkto kag ginkarga sa jeep paglampuwas sa utod nga dalan.
Gilayon man nga nagrequest ang LGU sang bulig sa Iloio Provincial Government agud temporaryo nga maagyan ang dalan.
Padayon naman ang pag-assess kun ano ang halit sa bahin sang agrikultura.
