Madamo nga kabaranggayan sa banwa sang Tubungan ang apektado sang landslide.
Sa interview sang Bombo Radyo kay Tubungan Mayor Roquito Tacsagon, iya ginpahayag nga may mga nawasak nga balay kag naguba nga dalan umpisa sang nagbubo ang mamunog nga ulan subong nga semana.
Isa ka balay ang naguba sa Barangay Bagunanay, isa sa Navillan, isa sa San Jose, isa sa Jolason, kag isa man ang reported nga guba nga balay sa Barangay Igdampog Norte.
Natiphag ang duta kag indi maagyan ang pila ka dalanon sa Barangay Teniente Benito, Barangay Victoria, kag Barangay Boloc.
Ginpaevacuate man ang kapin 10 ka mga pamilya sa isa ka sitio sa Barangay Sibucauan, Tubungan, Iloilo bangud posible nga ini nga sitio ang maapektuhan kun padayon pa ang paghulag sang duta sa ubos nga bahin sang Barangay Teniente Benito nga malapit sa suba.
Suno kay Tacsagon, padayon pa subong ang monitoring kag assessment sang local government unit kag posible isaylo sa mga eskwelahan kag covered gym ang mga residente kun maglala ang sitwasyon.
Sa subong, ang mga evacuees ang nagadayon lang anay sa ila mga himata kag nagahulat sang abiso sang local government officials.
Handa naman ang mga food packs kag igadul-ong subong nga adlaw, Oktubre 28.
