ILOILO CITY – Nagpagwa sang bag-o nga executive order si Iloilo City Mayor Jerry Treñas agud magsanto ang pagsulundan sang syudad sa national government may kaangtanan sa pagpasirado sang mga patyo sa syudad subong nga pista minatay.
Sa Executive Order No. 144-A , nakasaaad nga siraduhon ang tanan nga public kag private cemeteries umpisa bwas, Oktubre 29 (12:01 AM) tubtob Nobyembre 4 (11:59 PM).
Nahibaluan nga sa una nga executive order ni Mayor Treñas nga ginpagwa sang Setyembre 10, Oktubre 30-Nobyembre 2 ang pagpasirado sa mga patyo.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang iya una nga EO ang ginpagwa sang wala pa sang desisyon ang Inter-Agency Task Force for the Management of Emerging Infectious Diseases rason nga lain ang petsa nga nakabutang.
Istrikto nga magabantay ang mga personnel sang Public Safety and Transportation Management Office (PSTMO) kag kapulisan sa mga patyo sa syudad sa tion sang pagpasirado.
Pag-abot sang Nobyembre 5, 30% sang venue capacity ang pahanugutan.
