ILOILO CITY – Tuman ang kalipay sang Ilonggo singer nga si JM Bales matapos nag-trending ang iya ambahanon nga ‘Magandang Dilag’.
Ang nasambit nga ambahanon amo ang official nga soundtrack sa swimsuit competition sang Miss Universe Philippines 2020.
Sa exclusive interview sang Bombo Radyo kay Bales nga tumandok sang Barotac Nuevo, Iloilo, iya ginpahayag nga tatlo ka tuig pa lang, nagtuon na siya sa pagkanta sa diin ang iya amay amo ang nagserbe niya nga voice coach.
Suno kay Bales, ginakabig niya nga dako nga break ang paghatag sa iya sang kahigayunan nga magkanta sa Miss Universe Philippines 2020.
Ginpahayag ni Bales nga madugay na niya nga ginapangamuyo nga mahatagan sang kahigayunan nga makaangkon sang isa ka ambahanon nga mangin bantog.
Ginkalipay man ni Bales nga kadungan man sang iya pagtrending sang iya ambahanon nga ‘Magandang Dilag’ amo man ang pagdaog sang iya kaangay niya nga Ilonggo nga si Rabiya Mateo nga tumandok sang Balasan, Iloilo bilang Miss Universe Philippines 2020.
Ginakabig man sang natungdan nga double victory ang natabo para sa mga Ilonggo.
