ILOILO CITY – Mangin kumpleto sa Personal Protective Equipment (PPE) ang team sang Oplan Hawan Karsada sa pag-umpisa liwat sang road clearing operations sa syudad sang Iloilo sa Nobyembre 16.
Sa interview sang Bombo Radyo kay Jeck Conlu, pinuno sang Public Safety and Transportation Management Office (PSTMO), iya ginpahayag nga indi man paglapason sang road clearing operations team ang minimum health protocols apisar ululupod sila sa paghawan sang illegal structures ukon mga sablag sa dalanon.
Limitado man subong nga tuig ang team nga magagwa sa dalan bangud may trabaho pa ang compliance team sa COVID-19 response sa syudad. Suno kay Conlu, mangin kabahin sa gihapon sang team ang PSTMO, Office of the Barangay Affairs, Anti-Squatting and Illegal Structures Unit, Philippine National Police (PNP), kag Department of Public Works and Highways (DPWH).
Ginalauman man nga mangin mas daku ang kooperasyon sang mga opisyal sang barangay sa pagbalik sang Oplan Hawan.
Ang Oplan Hawan ang may kaangtanan sa gin-isyu ni Interior Secretary Eduardo Año nga Memorandum 2020-145 nga nagahatag sa local government units (LGUs) sang tion tubtob sa Enero 15, 2021 nga hawanon ang mga dalanon apang depende sa quarantine classification sang lugar.
